Rev 5 | PMA | STEP | Navong nales tounah keilek evus, nales kei koa mul rondan en vulin ten keihoen mul vuli kat pepa tai en hen matu koa selusien mul en usite keilu teni. Arei kati ka apil kati en siil oulu (7).

Revelation of John 5

Alekat Tai Koa Vinvin Vahuli Selusien ten Hothotien

1 Navong nales tounah keilek evus, nales kei koa mul rondan en vulin ten keihoen mul vuli kat pepa tai en hen matu koa selusien mul en usite keilu teni. Arei kati ka apil kati en siil oulu (7). ^{▼▼5:1 Siil vi ring koa isen mul ien. Mulamu, navong hetetamen tai mutis leta tai, kei pil kat leta en wax ten kandel ka rang kati en 'siil' onen. Mukonek, meatin koa kuri helei kilea isei sila ka helesi mun keke meatin sav keil arvulitei veah.} 2 Ka nales hetetamen tai onen angelo keil, kei visohiso en rea tai koa keih imok vit, “?Isei vinvin vakum vas siil keil, valuv lin pepa, ka vahuli selusien teni?” 3 Ka arvotin etai meatin en out nesa vuo en out netan vuo en huinev ten atan koa vinvin keke kilea vakum vas siil keil ka vahuli selusien koa mul en pepa enek. 4 Sakini namis roha veni asakras avahotin meatin etai koa vavinvin valuv lin pepa ka vahuli selusien keil koa amul ien.

5 Evus, tai en elda keil mai ka viteni minau vit, “Konouaitei. !Kilesi, kei koa avise en laeon ten vatiamal onen Sudah mul mai. Kei vi havinali asuv houlu Deved tai ka mul kur hiasuvien onen. Ka en vaeen ten demkatien, kei mulin Temat tuai. Kei enges vinvin vakum vas siil keil ka valuv lin pepa enek.”

6 Evus nales kei koa mae lat moulien onen suval etin sili sipsip tai. Kei mulomal vesesal ven vulin ten keihoen, luhu en elda keil ka tounah ehat (4) koa amoul. Nalesi suval amu vini tuai, ka moul mea ris. Hon ten keihoen onen oulu (7) ka meten emun oulu (7). Meten oulu enek avi ninin oulu (7) onen Ahi koa sila keil uva aka vasi out netan. 7 Kei koa suval sili sipsip va, kur pepa ran he matu onen tai koa rondan en mari vulin ten keihoen. 8 Navong va kuri, tounah ehat (4) koa amoul ka elda hanumau tai ka ehat (24) umot uva netan min kei koa suval sili sipsip. Tetai en keil akur kat harp ka more pesin koa amumoni en gol. En pesin keil enek amunit tounah koa vite tahos ien koa vi hisien keil onen meatin votut keil onen Ahi. 9 Keil amusau en souen hau tai avit,

“Keik kovinvin kovakur pepa koanek
ka kovakum vas siil keil teni.
Kovinvin veni amu vinik, ka ram vul lat meatin keil keke avi onen Ahi.
Anatin, kovul lat meatin ran vatiamal vasi keil ka ran selusien vasi keil,
ran kantri vasi keil ka ran meatin tateisav vasi keil emun.
10 Komumon keil umai avi vangi meatin keil
koa hiasuvien onen Ahi mul en moulien one.
Keik kosakin keil amum veni suval pris keil onen,
ka ilosil kat out vasi netan.”
11 Navong namul nalele, nalong ren angelo keil koa avi houlu vis avi houlu mok, meatin sakras vahul vasin! Keil amul rahit mari vulin ten keihoen, tounah ehat (4) koa amoul ka elda keil emun. 12 Angelo keil amusau roha avit,

“Kei koa amu vini suval sili sipsip ka moul eris,
kei vinvin keke mevati lat isen.
Hiasuvien ka meteisauen mul ien,
keihoen mul en hen ka vilelau en tounah houlu.
!Kei vi hetetamen ka mal keke mesan
houhouen ka masmasien onomai mini!”
13 Evus, nalong rea onen tounah vasi keil koa amoul amusau: koakeil ten out nesa ka ten out netan; koakeil ten huinev ten atan ka en atas. Anatin, nalong keil vasi amul amusau avit,

“!Hetetamenien ka keihoen mul
en kei koa rondan en mari vulin ten keihoen
ka en kei koa suval sili sipsip!
!Keilu luvinvin keke luvakur
masmasien ka houhouen onomai
lises ka lisenges!”
14 Navong aviteni mukok, tounah ehat (4) koa amoul avit, “!Anatin eli!” Ka elda vasi keil umot uva netan ka avati lat isealu.